عن الوجع !!

غريب الوجع اللي من النوع ده
لا انت قـده
ولا قد بُعـده

هو صاحبك و انت صاحبه
قلبه وجَع قلـبك قلبَك شَبَع قلبه
مركب ورق
والوجع سـاحبـُه
غصب عنك
تمشي دربُـه
تشتكيه لو يلازمك
لو يخاصمك
تبكي قُـربُه

الفرح
من غيـر وجع
كريزة ناقصة م التـورتـه
من غير وجع
الملامح
ناقصة حِتـه

الوجع مرسـول محبة
الوشوش من غيرُه " غُـربـة "
هو و انت تشبـهوا جدا لبعـض
اهل بيت واحد و كارف طبعكوا على طبع بعض

قولي كان امتى الوجع .. غريب عليك
قولي مين بَص في عنيـك
معرفش انك مخــاوي
الوجع
وان شكلك يابني غاوي
وجع
و ان قلبك
شِبـاك حكـاوي
ع الوجع

لسا بردو غريب الوجع اللي من النوع ده ؟!!
ولا عادي











Hassan el-Sheikh

تحت تصنيف: مصريات